Glanssjefs Isabella Niehaus en Louis Jansen van Vuuren het saamgespan om hierdie pragpublikasie, ‘n splinternuwe kosboek getiteld Skepselkos uit Naledi se stal, die lig te laat sien. Isabella (bekroonde skrywer) en Louis (kunstenaar en skrywer) het die gesogte Gourmand World Cookbook Awards in 2023 gewen met Daar’s ‘n Vegan op my Verandah. Hulle betrek in Skepselkos ook agt vriende, almal sjefs en koskundiges, om vir die leser ‘n agter-die-skerms blik te gee op Suid-Afrika se plantgebaseerde koservaring.

“Lesers sal geïnspireer word deur die stories en resepte [in Skepselkos] wat ‘n waardering skep vir vegan kos. Die resepte is toeganklik met alledaagse bestanddele wat maklik beskikbaar is. Met Skepselkos nooi Isabella en Louis jou uit om op ‘n uitsonderlike kulinêre avontuur te gaan. Hierdie boek bied iets vir almal, of jy nou ‘n ervare sjef of ‘n nuweling in die kombuis is. Dit is meer as net ‘n kookboek – dit neem jou op ‘n reis van geur, kultuur en kreatiwiteit wat ‘n blywende indruk sal laat en jou ook sal inspireer en aanmoedig om te eksperimenteer.”

Skepselkos beslaan 348 bladsye en is propvol kleurfoto’s van watertandgeregte. Die kunstige bladuitleg deur Karen Cronjé dra by tot die boek se visuele aantrekkingskrag. Koskenners Kobus van der Merwe, Zola Nene, Vickie de Beer, Reuben Riffel, Johnny Hamman, Arina du Plessis, Lizelle Stolze en Carmen Eksteen se heerlike geregte verskyn in die boek. Daar is ook resepte van kosvriende soos onder meer Errieda du Toit, Cariema Isaacs, Elmarie Berry, Carmen Niehaus, Portchie, Therese Bam en Riana Scheepers. Verder pryk die kookboek ook met handige wenke en raad, wyse aanhalings, voorstelle vir gepaste wyn, en lekkerleesskrywes wat soos blinkgevryfde rivierklippies in jou hart kom lê.

Louis skryf op bladsy 2: “Dit was ‘n uitgemaakte saak dat ons nuwe boek Skepselkos sou heet. Met hierdie nuwe publikasie eer ons die waardes van plantkos. Ons vier voedsel wat met sorg en liefde gekweek en voorberei word. Ons is bewus van die planeet se kwesbaarheid en ons loop sorgsaam en met ligte tred oor die landskap wat ons ons tuiste noem. Maar, ons loop die pad saam.”

Isabella skryf op bladsy 4: “Ons [Sy en Louis] praat deurmekaar, oormekaar, maar weet albei ons wil ‘n nalatenskap van omarming hier los. ‘n Voetspoor met ‘n enorme hart. ‘n Boek waarin ons vriende pronk. Waar Louis sy vegan leefstyl en liefde vir die aarde in sy mooie poëtiese skrywes kan vertel. Waar ek my nuwe opgewondenheid en nuuskierigheid van ‘n vegan leefstyl in my verteltrant van skryf kan neerpen met sinne en los woorde wat op mekaar volg met min werkwoorde. ‘n Boek waar ons albei se motto uit Verandah weer pronk: The Earth is my Eden.”

Ek lys hier ‘n paar geregte wat in Skepselkos pryk: Soetpatatbobotie, botterskorsiegebak met tamatie-en-uie-smoor, pampoentert, persimmon en verkoolde groenboontjieslaai, Griekse kekerertjiesop, waaier-aartappels, vegan jaffels, botterboonkerrie, moussaka, roos-en-pistasieneutkoek en Meraai se blatjang. Jy kan ook jou eie speserye soos byvoorbeeld Italiaanse kruie, Cajun-speserymengsel en Chinese vyf-speserymengsel maak.

“Hierdie boek gaan hopelik jou lewe ‘n klein bietjie verander. Skepselkos is ‘n boek oor kos en mense. Kos wat sorgsaam en met invoeling voorberei word vir en deur mense wat omgee vir mekaar en omgee vir Moeder Aarde, ” aldus Louis op bladsy 15. Ek stem saam. Hierdie is ‘n besonderse kosboek en ek is baie trots om dit by my versameling kookboeke te voeg. Louis en Isabella het inderdaad daarin geslaag om al die kleurvolle drade saam te snoer in ‘n reeks betowerende hoofstukke.

“Skepselkos is ons eie tapisserie, geweef saam met vriende en geliefdes wat vir jou ‘n oomblik of twee van vreugde sal bring” (b. 1).

Klik op die foto links om die resep af te laai.

Skaf jou kopie van Skepselkos hier aan.

Kompetisie

Twee gelukkige KragDag-lesers kan elk ’n kopie van Skepselkos wen. Skryf in die kommentaarveld hier onder waarom jy die boek graag sou wou wen. Die pryse kan slegs na ’n adres in Suid-Afrika gekoerier word. Sluitingsdatum 31 Maart 2025.