Titel: Vleis

Outeur: Annelien Pienaar

Uitgewer: Human en Rousseau

Ek het sommer baie breed geglimlag toe die koerier my kopie van Annelien Pienaar, skrywer van die baie gewilde Boerekos met ’n twist, se splinternuwe boek, Vleis, aflewer.

Pienaar is ’n voedselwetenskaplike, dosent, boervrou en ma. Haar Facebookblad, Boerekos met ’n Twist, het meer as 43 000 lede met wie sy graag gereeld interaksie het. Ek het ook op haar webblad gaan rondloer en is aangenaam verras deur die praktiese raad, wenke, aanlyn klasse, produkte en resepte waarop besoekers getrakteer word. Sy skryf dan ook die volgende boodskap van dank aan haar lesers in Vleis: “Sonder julle sou nog ’n boek nie moontlik gewees het nie. Kom ons twist voort, dié keer met vleis!”

Hierdie indrukwekkende vleisboek beslaan 272 bladsye en, behalwe die omvattende inleiding en ’n afdeling wat handel oor algemene inligting, gaarmaakmetodes, terminologie en omskakelings, ’n verdere sewe hoofstukke getiteld: “Beesvleis”, “Lam en skaap”, “Vark”, “Pluimvee”, “Afval”, “Wild”, en “Marinades, souse en soute”. Daar is meer as 100 resepte waaraan vleiseters hulle kan verlustig. Gesinsetes, tradisionele maaltye en onthaalkosse laat die mond water. Ek hou veral daarvan dat Pienaar ook plan sien met oorskietkos. Met die deurblaai van Vleis was ek opnuut dankbaar dat my vleistande niks makeer nie, want vleis is nie net lekker en vullend nie, dit is ook voedsaam.

Die uitgewersbrief lui: “Dié boek bevat alles wat jy ooit oor vleis wou weet – die snitte, voedingswaarde, veroudering, faktore wat die sagtheid bepaal, gaarmaakmetodes, bevriesing, terminologie – om net ’n paar aspekte te noem. Met resepte vir van bees, lam en skaap, vark, pluimvee, afval en wild tot marinades, gegeurde soute en olies om die snitte te komplementeer, sal dié boek sy plek volstaan op jou kombuisrak.”

Die lokteks op die agterblad lees: “Die omvattende gids is ’n moderne ensiklopedie wat ’n ereplek verdien in die kombuis van almal wat graag vleis eet en gaarmaak. Afgesien van resepte vir smullekker vleisgeregte vir elke okkasie bevat dit hope inligting oor die beste manier om die verskillende snitte en soorte vleis te berei, hoe om vleis te vries of tot perfeksie te verouder, tesame met talle wenke om geur en sappigheid te verseker – alles sonder preserveer- en ander kunsmatige bymiddels.”

Ek noem hier onder weer die onderskeie hoofstukke en gee dan drie voorbeelde by elk van die heerlike vleisgeregte daarin vervat:

Beesvleis (Geurige gerookte borsstuk oor die kole, Prima rib met ’n balsamiese uiebottersous, en Worsrolletjies)

Lam en skaap (Lamspastei, Portugese vlamgeroosterde skaapboud, en Skaapkerrie)

Vark (Varklies met bros krakeling, Heuninggemarineerde kortribskywe, en Ouma Hantie se kaiings)

Pluimvee (Geurige gestopte werfhoender, Feestelike kalkoen, en Eend Confit)

Afval (Skaapkop, Skaapafval in tamatiebredie, en Skilpadjies met netvet en spekvleis)

Wild (Springbokboud in rooiwynsous, Wildspastei, en Wildsvleis-souttert)

Marinades, souse en soute (Balsamiese rooi-ui-marmalade, Stasiesous-bêremengsels, en Parmesaan-en-knoffelsout)

Pienaar – ’n vrou van vele talente – het ook die fotografie behartig en haar pragtige kleurfoto’s van die geregte vertoon atmosferies, luuks en aptytwekkend. Ek sou net graag wou sien dat hierdie besondere boek ’n hardeblad omslag moes hê ter wille van duursaamheid, maar dit sou sekerlik nie ’n koste-effektiewe opsie wees nie. Die wye verskeidenheid resepte sal tuiskokke én professionele kokke sommer dikwels na die boek laat reik. Die gereg wat ek vir seker gereeld sal voorberei is die smaaklike hamburgerfrikkadelle op bladsy 74.

Vleis is ook in Engels beskikbaar as Meat. Kry jou kopie hier of bestel dit direk op Pienaar se webblad en teken in op haar nuusbrief.