Pharos publiseer Skryf Afrikaans van A tot Z: Die essensiële gids vir taalgebruikers (SAAZ³), ’n hersiene uitgawe.

KragDag voel saam met ons lesers en uitstallers sterk oor die ontwikkeling en voortbestaan van Afrikaans. Met dié dat ons die “Doen jou eie ding!”-leuse voorhou, is dit belangrik dat entrepreneurs en voorstanders van volhoubare, selfstandigheidsoplossings wel toepaslike en wetenswaardige inligting oor hulle besighede, produkte en dienste oordra in suiwer Afrikaans. KragDag beywer hom dan ook daartoe om op ons webwerf, nuusbrief en ander kanale in Afrikaans te kommunikeer. ’n Taal oorleef en floreer immers wanneer dit gebesig word en daar ook in geskryf word.

Ek was daarom sommer baie opgewonde toe die koerier hierdie derde uitgawe van Skryf Afrikaans van A tot Z in die kenmerkende oranje kleur by my voordeur aflewer. Dit is nie net gemik op professionele teksversorgers nie, maar enige taalgebruiker wat effektief in moderne en keurige Afrikaans wil kommunikeer, sal daarby baatvind. Die bron is lesersvriendelik en taalkwessies word in maklike, verstaanbare taal verduidelik. Diegene wat ’n vrywees-filosofie aanhang, doen-dit-self-planne maak en hulle daaroop toespits om al minder afhanklik van ’n staatsbepaalde lewe te wees, kan hierdie bron ook met die grootste vrymoedigheid gebruik. Eerste indrukke geld. Goedgeskrewe skryfstukke (al is dit net vinnige e-pos aan ’n klant of kliënt) en ook keurige verbale kommunikasie help om innoverende idees en inligting met trots oor te dra.

SAAZ³ is kundig bygewerk volgens die elfde Afrikaanse Woordelys en Spelreëls (2017) en word beskou as gesaghebbend, gerekend en betroubaar. Dit word op die agterblad beskryf as ’n “standaardverwysingswerk vir taalgebruikers wat Afrikaanse taal- en stylkwessies vinnig in een gerieflike bron wil opsoek”. Dit wys die jongste taalgebruik, hedendaagse woordvoorkeure en verskillende taalverwante keuses uit. Bowenal is daar ’n nuwe afdeling oor die opstel van ’n huisstylgids.

Die bygewerkte gids bestaan uit drie baie leersame dele. Deel 1: Die praktyk van wetenskaplike Afrikaanse teksversorging gee duidelike riglyne oor die versorging van teks en die gebruik van bronne. Die 100 algemeenste foute in Afikaanse skryf- en redigeerwerk word ook verduidelik. Deel 2: A tot Z oor Taalkwessies handel oor meer as 5 000 alfabetiese inskrywings van verwarrende woorde, wisselvorme, verkeerde voorsetsels en lomp taalgebruik. Deel 3 beslaan 26 afdelings met inligting oor onder meer afkortings en simbole, binne- en buitelandse plekname, geldeenhede, vuurwapens, lees- en skryftekens, hoof- en kleinletters, verwysings in skryfwerk, ens.

Meer oor die skrywers:

Sebastian Pistor, die hersiener van SAAZ² en SAAZ^3, is ’n afgetrede taalpraktisyn met meer as 40 jaar ervaring in die uitsaaiwese as verslaggewer en taalpraktisyn. Hy was  onder meer taalredakteur van Die Burger en hoofteksversorger van Son. Hy het heelwat taalgidse geskryf en saamgestel oor die jare.

Dalene Müller is reeds in 2007 oorlede, maar sy het vir etlike jare in die uitgewerswese en by Die Burger gewerk. Sy het voorbeelde van probleemgevalle in Afrikaans versamel. Dit is in 2003 uitgegee as SAAZ¹. Haar nalatenskap aan teksversorgers is geweldig waardevol en daar word daarop voortgebou.

Skaf gerus ’n onontbeerlike kopie van Skryf Afrikaans van A tot Z: Die essensiële gids vir taalgebruikers (SAAZ3) vir jou huis en kantoor hier aan.