Die bekende Herman Lensing, kosredakteur van die tydskrifte SARIE en SARIE KOS en aanbieder van verskeie van sy eie gewilde kosprogramme op TV, se sesde kookboek getiteld HUISKOS is pas op die boekwinkels se rakke uitgepak. Dit is ook in Engels beskikbaar as Home Cooking. Sy vyf ander kookboeke, Voorskoot, Nóg ’n voorskoot, In my kitchen, 30 en Dit Proe Soos Huis, het van die rakke af gevlieg.

HUISKOS beslaan sowat 35 000 woorde en 194 volkleurfoto’s. Dis ’n grootformaat sagtebandboek van 192 bladsye en bevat 80 resepte. Die inhoud bestaan uit die volgende hoofstukke: Kom ons kook Huiskos (Inleiding); Voorwoord; Bykosse vir dae; Brood, botter en konfyt; Dis koue kos!; Slyp jou vleistande; Kom vir brekfis, bly vir lunch; Koekies en beskuit (soos ouma s’n!); Soet, soeter, soetste; My vriende se potte; Laaste proe (soos vinkel en koljander) Erkennings; Resepte indeks en Die laaste sê. Beverley Dodd is die uitgewer, Elmari Potgieter die redakteur en Michael le Grange die fotograaf.

Ek noem elke hoofstuk hier onder en gee drie resepte by elkeen:

Bykosse vir dae: (Anna se kerriepastaslaai; Moskonfytpatats; Ingemaakte kerriekool)

Brood, botter en konfyt: (Kaasskons; Noord-Kaapse vyekonfyt; Knoffelring vir jou braai)

Dis koue kos!: (Sandveld se sousboontjies; Hartenbos se ertjieslaai; Pynappelbier)

Slyp jou vleistande: (Boontjiesop met Marmite toast; Pastoriehoender; Lamsribbetjies met salsa verde)

Kom vir brekfis, bly vir lunch: (Snoekkoekies met somersous; French toast-rolletjies; Tuisgemaakte sousbone met wors)

Koekies en beskuit (soos ouma s’n!): (Brosbrood; Weet-Bix-beskuit; Lepelsteeltjies)

Soet, soeter, soetste: (Kondensmelkkoek; Die ware basaarpoeding; Feestelike cassata)

My vriende se potte: (Margit se bobotie; Marie se wortelkoek; Rina se outydse melksnysels)

Herman, 2010 en 2017 se wenner van die gesogte Galliova-toekenning as Suid-Afrika se topkosskrywer, dra HUISKOS aan sy lesers op: “Hierdie is my liefdesoffer aan julle, my lesers. Ek kook vir julle. Want julle is die ware fakkeldraers van HUISKOS. Julle is aan die ‘frontlinie’ in ons huise en die eerste kontak met geliefdes. Julle verdien ’n boek vol van die einste resepte wat julle pantser, sneesdoekie en drukkie is.”

Hy skryf ook: “HUISKOS is die pleister as daar seer is. … Die wêreld is op sy kop gedraai en op wie se knoppie word daar gedruk om ons emosioneel aan die gang te hou? Piesangbrood, nederig en eenvoudig. As dinge rof raak, soek ons nie vyfster nie, ons soek veilig wees, ons soek onthou. Ons soek eerlik lewe.”

Michélle van Breda, SARIE-redakteur, skryf: “Stories vertel, dís eintlik wat Herman met kos maak. En dan neem hy ons saam op ’n nostalgiese reis. Van doer tot nou. Met elke smaak, tekstuur en geurkombinasie loop ons saam die kospad. Gesels ons kospraatjies saam. Herman noem die HUISKOS, ek noem dit hartskos, want elke bestanddeel is met sorg gekies en dan berei met liefde en die groot onthou. Dis heerlik en dis salig.”

Nataniël skryf van HUISKOS: “Vir dié van ons wat in die nuwe wêreld ’n veilige, verantwoordelike, heilsame en kreatiewe bestaan wil voer, is HUISKOS die enigste kos. Herman is ’n uitstekende kosskrywer en bring ’n ganse kultuur se herkoms, tuiskoms en toekoms na die tafel.”

Op die meeste blaaie is daar notas van lesers wat vertel wat huiskos vir hulle is. Daar is ook staaltjies wat sommer baie lekker lees. Die kookboek wek ’n gevoel van nostalgie op en laat jou onthou van spesiale oomblikke toe jy saam met geliefdes aan heerlike eetgoed gesmul het.

My eerste gedagte toe ek die eerste keer deur HUISKOS blaai, was: “A, ek sal hierdie resepte régtig kan maak – dis maklik, eenvoudig en pretensieloos!”

Penguin publiseer Herman Lensing se HUISKOS. Bestel jou kopie hier.