Twee gebedsjoernale het onlangs op my lessenaar beland: een vir mans en een vir vroue. Ek glo dat KragDag-lesers baie baat hierby sal vind. Beide joernale, Vroue van geloof: Geloof soos ‘n mosterdsaadjie en Manne van geloof: Geloof om berge te versit, word deur Christelike Uitgewers Maatskappy uitgegee. Die gebedsjoernaal vir vroue is vertaal uit die Women of Faith Prayer Journal (Christian Art Publishers) en die gebedsjoernaal vir manne is deur die alombekende en geliefde Angus Buchan geskryf.

Vroue van geloof: Geloof soos ‘n mosterdsaadjie

Die lokteks lui: “Ontsluit die krag van gebed in jou eie lewe wanneer jy die lewensverhale lees van 30 vroue van geloof – vroue soos Corrie ten Boom, Susanna Wesley, Francis Havergal en Amy Carmichael, en ook Bybelkarakters soos Hanna, Maria, Rut en Ester.”

Die joernaal beslaan 128 bladsye en daar is vrae vir nadenke en ook riglyne vir gebed. Ek hou veral daarvan dat daar plek is vir persoonlike aantekeninge en gebede. Dis eintlik ‘n minikursus op sy eie, een wat ruimte laat vir selfondersoek en jou vol moed sal laat om enige probleme op jou pad te trotseer.

Uittreksel: “Maar God het ‘n ander einde vir Naomi se verhaal beplan. Hy sou haar nie bitter laat nie, maar haar herstel en seën. God is getrou en min het Naomi geweet dat sy Goddelike plan en doel deur haar skoondogter Rut en haar losser-man, Boas, geopenbaar sou word. Deur Naomi se verlies het die wêreld uiteindelik ‘n Redder verkry. Deur haar bitterheid is die wêreld uiteindelik geseën. Uit Rut en Boas se huwelik is ‘n seun gebore wat die oupa was van koning Dawid, en uit hierdie koninklike geslag is ons Here en Verlosser, Jesus Christus gebore.” (65)

Manne van geloof: Geloof om berge te versit

Die lokteks lui: “Ondersoek die lewens van 30 geloofshelde wat berge verskuif het deur getroue gebed, waaronder Charles Spurgeon, Oswald Chambers, E.M. Bounds, Johannes Calvyn, Augustinus, en ook Bybelkarakters soos Dawid, Job, Abraham en Salomo. Hierdie gebedsjoernaal sal jou help om die man van God te word wat jy bedoel is om te wees.”

Die joernaal beslaan 128 bladsye en daar is ook insiggewende vrae wat manne sal laat nadink en riglyne vir kragtige gebede. Die meer as genoeg plek vir persoonlike aantekeninge en gebede inspireer jou om interaktief met die boodskap om te gaan en dit werklik jou eie te maak.

Uittreksel: “[William] Carey het in sy leeftyd gesien hoe Indië sy deure oopmaak vir sendelinge, hy het gesien hoe die edik uitgevaardig word wat suttee verbied (die verbranding van weduwees op die brandstapels waarop hulle oorlede mans verbrand is), en hy het gesien hoe baie mense hulle tot Christus bekeer. Hy het Indiërs aangemoedig om sendelinge te word en gehelp om die landbouvereniging van Indië tot stand te bring. Hy het groot dinge van God verwag en groot dinge vir God gedoen!” (29)

Die goed nagevorste lewensverhale van die vroulike en manlike geloofshelde is baie leersaam en interessant.

Skaf jou kopie van Vroue van geloof: Geloof soos ‘n mosterdsaadjie hier aan en kry Manne van geloof: Geloof om berge te versit hier.

Kompetisie

Twee gelukkige KragDag-lesers kan elk ‘n kopie van beide boeke wen. Die boekpryse kan slegs na ‘n adres in Suid-Afrika gestuur word waar ‘n koerier wel aflewer. Om vir die pryse in aanmerking te kom kan jy hier onder in die kommentaarveld vertel waarom jy die boeke graag wil wen. Sluitingsdatum 27 Februarie 2026.