Murdoch Books publiseer The Food Saver’s A-Z deur Alex Elliot-Howery en Jaimee Edwards. Dit is ’n stewige, hardeband publikasie en beslaan 518 bladsye.

Ek is sommer baie opgewonde oor hierdie besonderse boek en beveel dit heelhartig vir KragDag-lesers aan wat ernstig daaroor is om kosvermorsing hok te slaan. Die skrywers dra die boek op aan alle kokke van oraloor wat hulle bes doen dat so min as moontlik kos vermors word. Dis nie net moreel en eties nie reg om kos te mors nie, maar dis doodeenvoudig te duur om onverantwoordelik met kos om te gaan.  Soos die skrywers in die inleiding skryf: “It’s about real people cooking good, simple, affordable food while also making better environmental choices.” Hulle leuse is om eers te gebruik wat jy het alvorens jy winkels toe hol. Daarom plaas hulle meer as 150 algemene groente, vrugte, stapelkosse en selfs vis en vleis alfabeties onder die soeklig.

Hierdie kompakte, dik en tydlose boek is tjokkenblok vol waardevolle bergingswenke, idees vir voorbereiding, plaasvervangers en kortpaaie asook honderde heerlike randrekkerresepte om daardie laaste lekseltjie sous, poeier of meel sinvol aan te wend. Diegene wat daarvan hou om vars produkte uit die tuin te gebruik, sal bly wees dat soveel as moontlik van die eetbare dele van vrugte, groente en kruie gebruik en gepreserveer word. Trouens, daar is ’n baie handige preserveringsgids agter in die boek. Hoewel daar ook ’n paar illustrasies in die boek is, fokus die skrywers hoofsaaklik op die oordra van inligting deur middel van teks.

“The layout is an A-Z ingredient manual, designed to help you use up anything you’re sick of looking at or that’s going to go bad next week. We’ll show you how half a jar of tomato paste can be turned into dinner, just how many things you can do with a tired broccoli head, how delicious cauliflower leaves are, and how never to throw away cooked pasta or rice again. You’ll find advice on what ingredient goes with what, ways to store food properly for longer life, quick ideas for what to do with awkwardly small amounts of something, waste hacks, ingredient swaps, preserving tips and, of course, the answers to that endless question, ‘What’s for dinner?’”

Elliot-Howery en Edwards is beide entoesiastiese kokke en ervare opvoeders by die gewilde Cornerstone Cooking School waar hulle die afgelope 16 jaar lank hulle kookvernuf slyp. Hulle is nie net vriende en kollegas nie, maar hulle vorige boek getiteld Use It All is baie gunstig ontvang. Die positiewe reaksie en terugvoer op die boek het hulle laat besef dat daar ’n geweldige behoefte onder huishoudings van oraloor bestaan om hulle gewoontes in die kombuis aan te pas sodat minder kos verlore gaan. Mense wil nie net minder tyd in die kombuis bestee en omgewingsvriendelik te werk gaan nie, maar hulle wil boonop graag geld spaar. Hulle wil graag besuinig, maar sonder om smaak en voeding in te boet.

The Food Saver’s A-Z is die perfekte boek om in jou kombuis te hê, want jy kan blitsig naslaan wat jy met jou oorskietkos kan maak of hoe jy selfs jou piesangskille kan gebruik of jou ou soutbeskuitjies weer vars en krakerig kan laat proe.

Klik hier om te sien hoe die boek binne lyk.

Skaf gerus jou kopie van The Food Saver’s A-Z hier of elders aanlyn aan. ISBN: 9781911668534

Wen ’n boek!

Een gelukkige KragDag-leser kan met die komplimente van die uitgewers ’n kopie van The Food Saver’s A-Z wen. Al wat jy moet doen om in aanmerking te kom vir die wonderlike prys, is om hier onder in die kommentaarveld te vertel waarom jy graag hierdie boek wil wen. Sluitingsdatum 14 Mei 2023.