Ek was baie opgewonde toe ek hoor die gasvrye Willie Strauss se jongste resepteboek getiteld Sinkhuisresepte is pas deur Lapa gepubliseer, want ek het sy debuutboek, Daar is ‘n engel in my koskas, sommer baie geniet. Sinkhuisresepte stel beslis nie teleur nie. Dit is nie net ‘n heerlike versameling resepte nie maar ook ‘n visuele bederf vir die oog met aptytwekkende foto’s en pragtige dekor. Die lekkerleestitels en Willie se stories en vertellinge het my heeltyd laat omblaai om die volgende kreatiewe woorspeling te waardeer.

Sinkhuisresepte beslaan 176 bladsye en meer as 100 smaaklike resepte. Daar is agt afdelings getiteld Voorhek, Voordeur, Gang, Kombuis, Sitkamer, Slaapkamer, Eetkamer en Op die werf. Van die interessante titels is: So by my VY; TJIPS, daar kom ‘n engel; Daar is ‘n veer op jou BLAD-JANg; Sies, jy het VARK-erige gedagtes; Die WORTEL van goed en kwaad en As die engel jou BEET-kry.

Willie skryf in die Voorwoord oor sy sinkhuis in Cullinan: “Hierdie ou Sinkhuis is een van Cullinan se oorspronklike huise. Volgens die papiere is dit in 1905 gebou, in die jare toe mense nog hierheen gestroom het met drome van diamantglans- en glorie. … Dit is inderdaad my droomhuis en hier is meer rykdom as wat enige diamant kan bring. Hierdie boek wat jy nou vashou, is so ‘n droom. Berei die disse vir die mense wat jy liefhet, rond dit af met wat beskikbaar is en soos jy die dag voel. Vandat ek my ma kleintyd voor die Jewel-houtstoof sien kook het, wou ek ook mense toevou met geure van anys en vleispastei, appelkoos en skilferkors. In my eerste kookboek, Daar is ‘n engel in my koskas, kon ek jou neem op ‘n reis deur my kinderdae in die Noord-Kaap en voorstel aan my ma wat so doenig in die kombuis was. Dié keer nooi ek jou om saam met my in my sinkhuis te kom kuier. Ons sal deur my albums blaai en ek sal vir ons mooi musiek aansit. Ons sal op die stoep sit vir oggendtee, terwyl ons kyk hoe die swane in my dam swem. En wanneer jy honger is, gaan ons sommer by die kombuistafel sit vir iets lekkers.”

Ek lys hier ‘n paar van die heerlike resepte in die boek: vyevierkantjies; botterskorsie-en-spektertjies; lekkerbek-ertjiesop met Russiese worsies; flippen lekker hoender; tunarol; wildspastei met slapdeegkors; boeliebief-souttert; sinkhuissopmengsel; rooikop-eiland se sultanablatjang; ma se biltong-en-marmite-tert; beesvleis-en-niertjiepastei; dadelbrood met karamelsous; geurige vleispasteitjies; vyfbeker se brandewyntert; geurige varkbredie; pampoenskilbredie; sinkhuislasagne en liplekker koolgereg. Daar is selfs ‘n paar liplekkerresepte vir jou troeteldiere, naamlik kiep-kiep-balletjies vir honde, tunakoekies vir katte en ‘n hart van saad.

Meer oor die skrywer: Willie Strauss in op Kenhardt in die Noord-Kaap gebore. Hy het hom eers in die uitvoerende kunste uitgeleef maar toe begin kosrubrieke skryf vir die Rapport-tydskrif My tyd. Hy lewer gereeld kospraatjies op RSG en Pretoria FM en verskyn as gas op verskeie TV-programme. Ons ken hom ook as mede-aanbieder van Kos is oppie tafel op die onafhanklike kanaal ASTV. Willie toer tans deur Suid-Afrika met sy produksie Willie kook.

Kompetisie

Een gelukkige KragDag-leser kan ‘n eksemplaar van Sinkhuisresepte wen. Die boekprys kan slegs na ‘n adres in Suid-Afrika gestuur word waar ‘n koerier wel aflewer. Om vir die prys in aanmerking te kom kan jy hier onder in die kommentaarveld vertel waarom jy die boek graag wil wen. Sluitingsdatum 30 Mei 2025.