Soms is al wat jy nodig het, ‘n bietjie vars lug, ‘n rustige stap en die sagte geluid van voëltjies in die bome. Op die bekende KragDag-terrein, te Diamantvallei Landgoed, net 20 km oos van Pretoria, wag ‘n versteekte juweel: Komma Stap — ‘n roete wat jou uit die gejaag van die stad nooi, om asem te skep.

Of jy nou ’n gesoute stapper is of net op soek is na ’n rustige oggend saam met die kinders of jou viervoetige maat, Komma Stap bied vir almal iets besonders. Daar is drie roetes om van te kies: die Bergbokkie (2.7 km), die Vlakvarkie (2.7 km), en die Diamant (5.1 km) — elk met sy eie unieke karakter en natuurskoon. Die roetes wissel tussen berg, bos en oop velde, en neem gesamentlik gemiddeld sowat 1.5 uur om te voltooi. Jy jou eie pas kan kies.

Langs die pad wag daar dalk ’n paar vriendelike perde of selfs ’n bokkie wat nuuskierig kom kyk. Dis regtig ‘n ervaring wat jou siel streel. Die pad neem jou deur skaduryke bosgedeeltes vol voëlgesang, oop grasvelde met asemrowende uitsigte, en stil kronkelpaadjies waar jy net jyself en die natuur is.

En moenie bekommerd wees nie — Komma Stap is kinders-vriendelik én honde (met leibande) is welkom. Dit maak dit die perfekte naweekaktiwiteit vir die hele gesin, insluitend die pootjies!

Met toegang teen net R30 per volwassene (kinders onder 18 stap gratis), is dit een van die mees bekostigbare maniere om jou dag in die buitelug deur te bring. Jy kan ook ná (of voor) jou stap by Komma Koek en Koffie kom afsaal vir iets lekker te eet en te drink.

Praktiese Inligting:

• Tye: Maandag tot Vrydag 9:00 – 16:00, Saterdae 7:00 – 17:00
• Lengte van roetes: 2.7 km en 5.1 km
• Toegangsfooi: R30 per volwassene | Kinders gratis
• Honde welkom: aan ‘n leiband

Of jy nou stilte soek, kwaliteittyd met jou geliefdes wil deurbring, of net ’n nuwe avontuur soek — Komma Stap is waar jy jou asem kan terugkry, jou gedagtes kan laat dwaal, en net weer kan wees.

Sien jou op die roete!