“Ek glo elke kind verdien ’n regverdige kans op ’n helderder toekoms,” sê Jahno Snyman, stigter van die Backing the Littles Movement. “As voormalige onderwyser het ek gesien hoe kennis, aanmoediging en geleenthede ’n kind se lewe totaal kan verander.”

Met dié oortuiging trap Jahno en ’n span ondersteuners van 9 tot 11 Oktober 2025 die 500 km Lakes to Mbombela-fietstoer, in vennootskap met Aquafer. Hierdie drie-dag reis het een doel: om hoop en geleenthede te skep vir kinders wie se omstandighede hulle andersins agter sou laat.

Twee ligpunte in Danville en Elandspoort

Die fietstoer ondersteun EDEN Akademie en Sion Sport Akademie, twee organisasies wat daagliks ’n tasbare verskil in jong mense se lewens maak.

By EDEN Akademie kry kinders ’n veilige plek waar hulle kan leer, speel en eenvoudig weer kind wees. “Omstandighede hoef nie jou vermoë te bepaal nie,” sê hoof Melandri Sneygans. “Ons sien hoe kinders wat onseker en teruggetrokke was, blom en selfvertroue ontwikkel.”

Sion Sport Akademie gebruik sport as instrument vir karaktervorming en lewensvaardighede. Hulle glo sport is sinoniem met dissipline, hoop en groei. Omdat 90% van hulle leerders se gesinne nie skoolgeld kan bekostig nie, word die deure oopgehou deur skenkings en borge – en deur ouers wat met klein bydraes en handewerk help om ’n toekoms vir hul kinders te bou.

Hoe jy kan help

Die Backing the Littles Movement roep individue, besighede en gemeenskappe op om betrokke te raak:

• Borg die fietstoer of ’n ryer
• Skenk finansieel of in produkte en dienste
• Help om die boodskap wyd te versprei

“Selfs een dag van hoop kan ’n hele leeftyd verander,” sê Jahno. “Kom trap saam met ons – fisies of in gees – en wees deel van die verandering wat kinders se lewens vir altyd kan vorm.”

Kontak

Meer inligting: Jahno Snyman – 061 062 3456
E-pos: backingthelittles@gmail.com